經歷咗大大小小線上馬拉松比賽，呢個讓香港跑友望穿秋水嘅實體馬拉松終於攪得成。全賴大會好努力想賺呢筆錢，好努力安排呢個跑手泡沫，例如跑前七十二小時要做快速檢測，寄存行李要早兩日等。
跑友終於體會到生活回復正常，只要你唔好提呢個賽事係喺香港攪同唔俾講加油就可以安心出行。
我今次有幸喺公海抽到隻半馬跑，準備時間前後不足一個月，唯有食老底慢慢跑。無事嘅，鬥長命，只要唔好死，就可以繼續向終點跑。
起步在彌敦道，轉入亞皆老街，沿途都有持槍警員把守，陪覺安全，一啲都無戰地長跑感覺。為咗令港人生活回復正常地跑步，警方出動大量人力物力支持，跑手不經不覺間刷新成績絕不出奇。
出西隧後入龍和道，最後經崇光馬路返到維園，身體還算爭氣，不算很吃力，不過始終耐力不足，龍和道開始到維園跑得有些攰，攰到兩個鐘好似跑咗七年咁，攰還攰，個個都攰，想起有朋友去咗英國加入當地跑團，又覺得有無同路人都好大家自己都要跑埋佢。
有傳十二月又會有大型長跑比賽，又睇吓自己點喺香港跑下去。
