開始懷疑Pixar動畫係咪針對某一代人造電影。由我們細細個，到大個，到結婚，到生仔，到小朋友細細個，都在看Pixar時，近年看的Pixar，感覺題材不是給小朋友看，而且越來越觸動成年人內心。
盡量不劇透，只交待看預告片也會知道嘅內容。
一個追音樂夢嘅男人在快將得到一個覺得可以完夢嘅演出機會時死咗。
死咗，靈魂就離開身體去咗異世界／天堂／地獄，遇到了類似維持世界運行嘅主宰／神／管理人。
而呢個／啲主宰／神／管理人睇中咗佢，想用佢去証明一啲嘢。
這男人唔想死，努力搵方法返去彈琴，個主宰／神／管理人就offer咗佢，叫佢幫手教化／調教一個徘徊於該世界幾千年都唔想「投胎」嘅「小朋友」。
故事發展從簡，直接跳去結果，個男人「翻生」。
老實講，我唔肯定電影寓意係乜嘢，但看過很多人寫觀後感想，每個人分享都唔同。
對我嚟講，最大嘅反思係人要活得實在，就要先搵到生命裏嘅火花。呢個火花，唔一定係你自己覺得有嘅使命，唔一定係你天賦嘅異品，唔一定係你最鍾意嘅興趣，至於係咩，就係果一啲令你好想活下去嘅嘢。
講一大輪，你明唔明我講咩呀？
如果你唔明，當然好可能係我表達得差，但都有可能係，朋友，你仲後生。
這電影有趣的地方係，如果你生活歷練唔夠，我諗你會覺得幾悶下。主角喺翻生過程中所經歷的，係要重新去判定自己成世人都「以為係咁」嘅價值觀，佢覺得因為佢彈琴有天分，因為佢鍾意音樂，所以佢嘅夢想同目標就係要演奏音樂。為咗呢個夢想，佢拒絕咗好多，妥協過好多，甚至到「死果一刻」都係咁覺得，覺得自己妥協過嘅，係值得。
整套電影睇得最痛嘅莫過於主角翻生後，終於登上舞台，但演奏完的那份失望和空虛，一巴掌打落佢塊臉。
原來自己一直擁抱的夢想，不過如此。
電影講到呢度，我想分享嘅係，我呢個中佬一路睇一路諗緊，自己生活的中軸係啲咩。
互勉之。
