除咗衛斯理，另一個精神食糧係運動，都幾大量嘅運動。鬥長命對留下來的人來說，除咗係一句口號，一種精神，其實仲係一份令你可以作為起步點嘅信念。
講少少好悶嘅嘢，關於運動習慣同少少數據：
中年喇，受唔起傷患，大熱天又怕猝死，所以我嘅運動都係「低強度」。佔去我最大時間嘅運動係跑步，佔咗八九成時間，其次係游水，再其次係踩單車。但基本上所有運動都係低強度。
咩係低強度呢？唔駛太科學咩計心跳，計pacing，唔駛。簡單嘅一點：你今日做完呢個份量，你聽日可以再做。只係咁。
睇相佬同防疫專家呃你十年八年，但我唔會，我唔直接答你哋嘅疑問，我用自己做例子答你。
今年四月：跑步日數＝11，哩數＝66km
今年五月：跑步日數＝18，哩數＝93km
今年六月：跑步日數＝21，哩數＝110km
今年七月：跑步日數＝22，哩數＝120km
今年八月：跑步日數＝22，哩數＝122km
而當中絕大部份日子我只係慢跑30分鐘，大約4.5–5km（當然也有跑長少少到10km的時候）。呢三十分鐘有時放一朝早，有時放放工時間，不得不說WFH萬歲，基本上就係用搭車返工放工嘅時間已經做到。
呢啲慢跑，令我生活多咗少少攰，同時多咗少少安多酚，就幫咗我嘅新陳代謝同夜晚入睡，而最重要係第二日我再去慢跑係唔會覺得太大阻力或辛苦。呢啲每日做少少，好啱我性格，即係去一啲小店買嘢唔駛一次過買爆，可以慢慢懲罰佢哋，用次數俾壓力佢哋，等佢哋唔好放棄。
我覺得人係要洗下錢買下嘢俾自己先會開心。
所以，我都買咗新跑鞋俾自己。
就悶到呢度先，有機會再講運動。
講完動，講下靜。
我夠膽講，我咁多年嚟無放棄過香港樂壇。雖然呢幾年我哋可能突然好支持某啲歌手，然後又突然被背叛，然後又突然好支持另一個歌手，週如復始，屢敗屢戰，為的只係搵一個同聲同氣嘅真偶像。
