人到中年。
由以為好多嘢唔應該咁複雜，到明白所有嘢都要做好多嘢先可以簡單少少；
由以為自己係跑得快嗰個，到發現自己永遠起步係最慢嗰個；
由以為自己硬淨高抗壓，到一星期內見証自己崩潰幾次。
再睇埋《IT狗》。
不得不老套地停低，認真睇吓自己其實係邊個，發生緊乜事，同最重要，
「其實你想點?」
中佬對自己認知一：其實我由細到大都好寂寞，只係而家先勇敢接受寂寞。
由細細個開始，我已經知道每個人對不同事物的想法都唔同，而我係同每個人想法最唔同嘅一個。曾經我覺得係因為自己怪，係因為自己廢，係因為自己好多嘢，所以我好想人哋知道我點諗，唔係我寫文做咩？
到近年，工作上的角色，令我發現我所有想法都無亦唔會有隊友明白和支持，而原來當有資源將呢啲想法實行出嚟，係work嘅。由耐心解釋到廢L事講咁多，一有反對聲音，自己做咗佢算。霸權萬歲（跳起yeah）。
你知嘛，一場同事係唔需要做一場朋友㗎。我曾經喺一個喪禮請教朋友，我問佢以你嘅能力／性格／智商，咁你返工咪好辛苦？無人會去到你個level㗎喎，你點處理同事㗎？佢笑一笑：「唔好傻啦」。
我突然明白咗好多嘢。
今時今日，連生日願望都有機會獨犯法例，你期望有咩人會明白你想法感受？
寂寞，唔係問題，而係好似器官咁，每個人與生俱來嘅，好好攬下自己。
中佬對自己認知二：當發現自己有呢個童年陰影，除咗接受都要間中跨過一兩下。
細個阿爸好惡，成日同阿媽鬧交，於是我潛意識好討厭／怕同人起爭執。
前事完。
我有好長時間，甚麼差唔多成世人，都怕同人鬧交，爆seed，鬧三九唔識七嘅人只會喺FF出現。沉默、怕事，但亦成為咗自己想每件事做好少少做多少少嘅動力，因為我唔想俾人怪責俾人鬧，呢個狀態一直維持咗好多好多年，直至小兒出世。
