上一篇,好像有點放負和發脾四,但其實我重點係想提醒自己,要對自己好啲。係咪好難睇得出呢個重點呢?對於一個長期將情緒壓抑,而對同事又唔知點解要好聲好氣顧及人感受,而自己則無通風口排氣嘅人嚟講,肯將廢氣排出,巳經係對自己好。
講開又講多少少職場,有個問題在這幾年都間中浮現在腦海,就係:
「到底係咪一定要同同事做朋友?」
曾幾何時,我覺得同事做唔成朋友係因為自己唔夠好或者做得唔夠好,只要你溝通能力好,工作能力好,待人處事好,無理由同同事做唔到朋友嘅。但 到咗呢份工,我越做越覺得,好似唔係咁。
當然多少同社會有關,但同時我都有想想,朋友是甚麼一會回事。和和氣氣,好來好去,會一齊食午的朋友關係換嚟自己大量負面情緒和工作量,有甚麼好處?好處大概就只有少啲人憎我。但嚟到今時今日,我發現,人生唔可以永遠做爛好人,而即使你做懶好人,你也討好不到所有人。
其實以上一段,又係用嚟排出廢氣。
好,報個喜。
阿媽,我得咗。
竟然因著天時地利人和,有新工作機會喔。花了前後約二十個小時的面試,僥倖成功了,而且仲要係要進入全新未知嘅工作領域,無嘅,學新嘢囉,人到中年之嘛。
低調但宅心仁厚的性格,要由後勤的前線跳到去前線的後勤,我估死唔去啩,但為著突破,也為著未來的機會,更為著可能有一日會移民的準備,這個跳躍是值得一試的。
如果到最後,我轉得成工,又無俾人炒,我希望我可以睇番多啲書,寫番多啲文,劇我煲得夠多喇。生活中大大小小的想法我有好多,無嘅係時間同心情,我試試啦,再一次感謝人數還在緩慢上升的followers。
2022年一月開咗個衰頭,但二月又有個新機,我哋都要好好地過,盡力呼吸,對自己好啲,我又花錢喺自己身上開始。
互勉之。