2018年不約而同地被不同單位朋友問到我係咪仲有聽廣東歌。我答有，而且俾錢Apple Music就係為咗聽歌。不同單位的朋友都覺得我很奇怪，原因大概不出而家啲歌唔好聽，啲歌手無實力，同埋唔知去邊度聽。
我曾經有陣子都覺得新廣東歌唔好聽，總係覺得七、八十年代的好，四大天王很多金曲，陳奕迅同謝霆鋒的冒起，由梅艷芳，葉倩文，彭羚，鄭秀文看到容祖兒，謝安琪等，時代的曲唔同咗，人都唔同咗。但話唔好聽唔好聽，又繼續聽，而家回想起來，其實都同頒獎禮有關。
每年年尾年頭，頒獎禮就似將一年的歌highlight出嚟，睇下有咩新冒起歌手，又睇下咩歌最Hit，就係咁，有幾年明明無乜點聽歌，但因為睇頒獎禮吊住條尾，又叫做有聽下。
話歌手無實力，我覺得見仁見智，我到而家都唔覺得鄭秀文唱歌得，但我唔反感，唱Live得的歌手就不嬲都少，不過我覺得又同現實生態有啲關係。而家唱歌真係搵唔到食，一唱就要歌影視踩晒，最好搵到廣告拍下，先叫過到啲好日子，都未計背後幾多黑暗嘢，人脈嘢，結果出到枱面唱果班大部份樣子先決，就係咁水準。個人覺得如果歌手水準唔夠，noted，但無阻我去欣賞音樂。歌好聽但唱果個唔得，都係好音樂。
至於話，唔知去邊聽，係，除非你聽收音機，如果唔係你係唔知點可以免費聽到新歌，但係咪真係無途徑呢？搵食艱難，好多歌手都將新歌放上YouTube，甚至要搵個playlist都唔太難，或者唔算好方便，因為要用電腦和電話，更重要的係用data。不過我又好奇，好似話好多年輕人都聽K-Pop，佢哋又有咩途徑去聽呢？再講，MOOV、JOOX、KKBox、Apple Music、Spotify等音樂平台，俾少少月費，任聽喎，所以歸根究底，都係你其實鍾唔鍾意。
講返叱咤，基本上四台反目之前，每個頒獎禮都被評為黑箱作業，分豬肉，我不能否認呢啲問題真係好煞風景，亦叫人想罷睇。直至四台反目後，新城的人人有份而家看去都幾鼓勵音樂人，只要你有output就有獎；中文金曲已經無能力攪但又唔想斬咗佢，於是低調叫做攪咗，歌都無得聽；無綫果個我真係睇唔落，唔評論；叱咤係留低比較有心機的一個，到一日連佢都無埋，就真係沒有然後了。
今年叱咤，對大部份獎項我都無大反感，除咗容祖兒等咗二十年憑一首唔知咩講到咁巴閉的《心之科學》拎到至尊金曲，許廷鏗拎男歌手銀獎，（唔知係攞景定贈慶到被人cut佢致謝詞，個人覺得佢真係自我感覺好良好），其他獎項我唔覺有太夾硬的感覺。
另外，今年叱咤有幾個不得不提的位，如果你唔知，我怕你食午無話題。第一個位是今年女歌手金獎係謝安琪。呢個人妻女神，半淡出半休息下的狀態下因為幾首歌，突然大熱，大受歡迎，呢個係事實，唔係叱咤一心自捧出來。今年至尊唱片由謝安琪和Juno奪得，你可以覺得無咩嘢，因為CD已經係文物，但事實係隻碟一日賣斷。謝安琪一路以來的歌，相對地少情情愛愛，所以很是我杯茶，到今年配合Juno作的故事，談人妻談婚姻的真實，對佢拎到金獎，我衷心覺得高興。有趣的是，我產生了一個對Juno的疑問，到底Juno是否有真材實料呢？我真係唔知道，但我覺得佢的確係放心機…
