《全職獵人》我細細個已經開始睇，佢絕對有機會成為我睇到老年嘅漫畫或動畫。講真，如果佢畫番，漫畫好動畫好都會睇啦，其實，佢淨係畫分鏡我都okay。
無劇透顧慮啦～
我係真係好鍾意Hunter嘅，由獵人考試，學念，天空競技場，旅團，貪婪之島到蟻篇，每一個章節都好中意，但之後選舉同基路亞個妹呢就仲消化緊。
覺得選舉主要係覺得太多字，好多規則，如果無記錯，係獵人協成員要投到過一定百分比俾某候選人而總投票率要夠高先當選，如果選唔到，重做。（大概係咁？）跟住就選選選，候選人又出口術話唔想做呀，又唔夠人投票呀，攪一大爛餐，而事實上其實應該無乜讀者care邊個係會長，因為會長已死。
再者呢啲小圈子選舉，點投都係咁啦。
講返蟻篇，當年仲係追漫畫畫，其實覺得有啲「吹得太大」，實爛尾，點知佢個結局又幾好睇。除咗作者當年驚為天人畫咗十幾格全黑畫面作為結局的一集，個急轉直下嘅結局都叫得上係感人。因為有效地將蟻王同蟻嘅生態設定完全轉到蟻王同小麥嘅友情／愛情上，悲壯地攬住一齊死。
而動畫我覺得驚喜係，動畫將漫畫更具體地表達出蟻角們的性格，雖然蟻篇係極多閒角，極多支線，極多旁白，但動畫化後感覺比起一大段文字來得爽，至少你記少好多譯名of 蟻s。
之後落嚟，進入咗選舉篇，以我性格，幾分鐘幾分鐘咁，有排睇。
